شبرغان ده گی اوچ بویوک تورت یولده اوچ بویوک شخصیت نینگ آتی قوییلدی!
سونگی کونلرده جوزجان ولایتی نینگ مدنیت ریاستی تمانیدن اکثری شاه یوللر و بویوک تورت یوللر ینگی دن ناملنتیریلگن. اوشبو آتلر آره سیده هر بیر شخص نینگ دقتینی اوزیگه تارته دیگن جایلر آقچه بندری، سرپل بندری و اندخوی بندری نینگ تورت یوللری دیر.
شبرغان شهری نینگ ایشیگی صفتیده سنله یاتکن آقچه بندری نینگ بویوک تورت یولی "وزیر محمد اکبر خان" آتی بیلن ناملنگن، سرپل بندری نینگ بویوک تورت یولی "احمد شاه بابا" آتی بیلن و اندخوی بندری نینگ شاه یولی ایسه "میرویس خان هوتک" لرنینگ آتلری بیلن ناملنگن.
قالگن یوللرده هم شونگه اوخشه گن کیشی لرنینگ آتلری بار. بولر آره سیده گی بعضی بیر کیچیک یوللرده ایسه ظهیرالدین محمد بابر و مولوی جوهری لرنینگ آتلرینی هم کوره سیز.
اوشبو برنامه جوزجان ولایتی نینگ مدنیت رئیسی عظیم الله رحمن یار ابتکاری بیلن و افغان بیسیم شرکتی نینگ مادی یاردمی بیلن یولگه قوییلگن.
مدنیت رئیسی نینگ ایتیشیچه، مذکور آت لر جوزجان ولایتی نینگ بعضی بیر فرهنگی شخصیت لری ترکیبیده گی بیر مستقل کمیسیون آرقلی تنلنگنلر.
مذکور کمیسیون تمانیدن تصدیقلنگن شخصیت لر آتلری نینگ آستیده جوزجان ولایت مسئوللری، جوزجان بلدیه رئیسی عبدالحکیم مجیدی و جوزجان ولایتی شورا رئیسی مولوی عبدالحی حیات لر امضا قیلگنلر.
اوشبو شخصیت لرنینگ ابتکاری شبرغان شهریده گی اکثر فرهنگی لر و یاش ییگیت لرنینگ عکس العملی گه سبب بولگن.
شبرغان شهری فرهنگی لرینینگ ایتیشیچه، مذکور آت لرنی رویخطی نی تیارله گن کمیسیون ده اولردن هیچ بیریسی بولمه ی و اولر بیلن هیچ قنده ی مصلحت هم بولمه گن. حال بو که جوزجان ولایتی نینگ مدنیت رئیسی مذکور رویخط نی جوزجان فرهنگی لری تمانیدن توزیلگنینی ادعا قیلماقده.
باشقه تماندن مدنیت رئیسی رحمن یار، مذکور رویخط نینگ آستیده ولایت مسئوللری و ولایتی شورا رئیسی نینگ امضاسی بولگنینی کورستکن.
بو شونی کورسته دی که، نه فقط جوزجان ولایتیده گی حکومت مسئوللری بلکه خلق تمانیدن سیله نگن ولایتی شورا رئیسی هم اوز خلقی نینگ ایسته کلریگه قرشی عمل قیلیش گه بیل باغله گن.
هر بیر شهر نینگ تورت یول، شاه یول، کوچه و قشلاقلریده قوییلگن آتلر اوشه شهر و اوشه ملت نینگ تاریخی شخصیت لر، تاریخی واقعه لر و مدنی بایلیکلریدن یلدیز آله دی. چونکه شو یرلرنینگ آتی آرقلی تاریخی بویوک شخصیت لرنینگ آتلری کیله جک اولادلرگه یتیب باره دی و اولر بو شخصیت لرنینگ کیملیگی نی اره شتیریش بیلن اوزلیک لرینی یخشی بیلیب آله دیلر.
شو یوزدن شهرلر یوللری و منطقه لرینی نامله یدگن کمیسیون یا اداره هر بیر شخصیت نینگ شآن و شوکتی گه کوره، هر دایم کوزگه کورینیب تاخته یدیگن بویوک ییرلرنی تنله یدی. چونکه کیله جکده اوشه بویوک یرلرده آت لری قوییلگن شخصیت لرنینگ مجسمه لری هم توزه لیشی ممکن.
شو یوزدن جوزجان ولایتی مدنیت رئیسی یخشی اویلب آقچه بندری، سرپل بندری و اندخوی بندرلرینی نامله گن و مملکت شمالیده گی ییتی میلیون اوزبیک لرنینگ نظامی شخصیتی و رهبری صفتیده قبول بولگن جنرال عبدالرشید دوستم نینگ توغیلگن شهریده اونینگ آتی بیلن بیران بیر تورت یول یا شاه یولنی ناملشگه آر قیلگن. حال بوکه کابل دن باشلب مزار شریف گه چه اکثر شهرلرده دوستم بیلن هم سنگر بولگن احمد شاه مسعود نینگ آتیگه خاص شاه یوللر و تورت یوللر افتخار بیلن ناملنگن.
عکس حالده بوندن قریب 14 ییل آلدین ناملنگن کارتۀ دوستم منطقه سی نینگ آتینی یازیمه ی قویگنلر. کتته احتمال بیلن ینه بیر مدت دن کیین مذکور منطقه نینگ آتینی اوزگرتیریش نیتلری بولگنی سیزیلیب توریبدی.
شونداغ ریجه لنگن بیر رویخط نینگ استیده جوزجان ملتی نینگ نماینده سی بولگن ولایتی شورا رئیسی و شبرغان نینگ تانیلگن کدری بولگن بلدیه رئیسی هم اوقیمسدن امضا آتکن.
جوزجان اهالی سی نینگ حقیگه لوگردن کیلیب مدنیت رئیسی بولگن بیر کیشی ایمس، بلکه اوشه توپراقده اونیب اوسگن کدرلری و اوزلری سیله ب رآی بیرگن وکیللری ظلم قیلماقده.
بو دورده گی شخصیت لر تمانیدن بولگن اوشبو عمل نی جوزجان و شمال تاریخی هیچ بیر زمان اونوته آلمه یدی.
